اعرف ازاي تبيع على منصات السوشيال ميديا بكل سهولة
عرفنا إن تطبيقات السوشيال ميديا مش أخرها إنك تشير عليها بوستات او تقعد تكتب بوستات من دماغك في ساعة تجلي، ده ممكن هي اللي تأكلك عيش، وده عن طريق التجارة الإلكترونية زي الدخول في مجال الدروب شيبنج، طيب بعد ما خلاص دخلت المجال واخترت المنتجات اللي حابب تتاجر فيها هتعمل ايه بعد كدة ؟
هتبيع فين أونلاين :
عندنا قنوات تسويقية كتير:
- الفيس بوك عن طريق صفحتك الشخصية او تعمل صفحة بيع خاصة وكمان ممكن على الجروبات واللي بيتجمع فيها ملايين الأشخاص ممكن كمان الماركت بليس.
- الواتس اب ممكن تبيع عليه لإنه بيقدر يوصل لعدد كبير من الناس بسهولة وبشكل مجاني وبيسهلك تبعت صور وفيديوهات خاصة بالمنتجات بتاعتك.
- الإنستجرام دلوقتي بقى قوة تسويقية كبيرة خاصة إنه قوي في المحتوى المرئي وده خلى مطعم مشهور زي صبحي كابر على الرغم من نجاحه الكبير يبقى موجود على الإنستجرام.
- تويتر ممكن تبيع عليه الحاجات الإلكترونية اكتر والغالية لإن 80% من مستخدمي تويتر دخلهم مرتفع و 40% منهم من سن 18-29 سنة وده مؤشر على نوعية المنتجات اللي ممكن تسوقها عليه والناس اللي ممكن تستهدفهم.
- عندك كمان منصات جاهزة كتير للبيع بشكل مباشر زي سوق وجوميا وأولكس واللي بيسهلك البيع عليهم انتشارهم الكبير وعدد زوارهم اللي واصل ملايين.
- ممكن كمان تبيع على سناب شات لو كان جمهورك سعودي او عربي بشكل أكبر.
مميزات البيع على الفيس بوك وإستخدام فيس بوك شوب :
- تقدر تضيف عدد غير محدود من المنتجات.
- تنظم منتجاتك في مجموعات وفئات.
- تتواصل مع عملائك من خلال الصفحة مباشرة.
- تطلع على الإحصاءات الخاصة بالمبيعات والزيارات والمتابعين وبيانات كتير تانيه.
- منتجاتك هتظهر في Facebook Marketplace وبالتالي هتوصل لقاعدة أكبر بكتير من العملاء المحتملين.
خطوات إنشاء بيدج على الفيس بوك :
- روح على رابط إنشاء الصفحات واختار بيزنس أو براند وحدد فئة الصفحة حسب نوع منتجك واختار اسم مناسب للصفحة.
- بعدها اختار صورة بروفايل وكافر يعبروا عن منتجك واختار يوزر نيم للصفحة وده الإسم اللي هيظهر في اللينك بتاعها.
- بعدها هتضيف تفاصيل البيزنس بتاعك كوصف عام وعنوان وساعات العمل وغيره.
- نيجي دلوقتي للخطوة المهمة الخاصة بإنك تأسس قسم الشوب على الصفحة لإنه هو اللي هيبقى المتجر بتاعك فعلياً.
- أول حاجة هتروح على تسوق أو shop.
- بعد ما تضغط عليها هتظهر نافذة هتوضحلك إعدادات المتجر من حيث إنه هيخليك تعرض منتجاتك ويسهل الشراء وتستقبل فلوسك على حساب البنك اللي هتسجله، اقرأها واضغط على البدء.
- هتظهر نافذة تانية تسأل عن تفاصيل البيزنس بتاعك، سجله في خانة نوع عملك وسجل عنوانك، واضغط التالى.
- الخطوة اللي بعد كده هتسألك عن الولايات اللي هتبيع فيها ورقم تسجيل الضريبة الخاص بيك تقدر تتخطي الخطوة دي حالياً.
- بعدها هتحدد نوع المنتجات الي ناوي تبدأ تبيعها.
- وبعد كده هتجاوب على سؤال الفيس بوك الخاص بنوع نشاطك التجاري ومين المفوض أو ممثل أعمالك والإجابات هنا طبعاً خاصة بكل واحد فينا حسب تفاصيله.
- .آخر خطوة هتبقى خيارات الشحن وسياسة الإرجاع والبريد الإلكتروني لخدمة العملاء.
هيطلب منك إيه لما تيجي ترفع المنتجات ؟
- صور المنتج أو الفيديو ولازم يكونوا بجودة كويسة.
- الإسم والوصف، حاول تبدع فيهم عشان يجذبوا العميل.
- السعر لازم يكون مناسب وحاول تعمل خصومات حتى لو قليلة.
- المخزون.
- خيارات الشحن.
- شير المنتج على صفحتك من خلال الزرار اللي فوق كلمة inventory.
- خلي اختيار الشير puplic عشان يظهر للجميع.