التسويق لمتجر ووكومرس: ربط المتجر بأدوات جوجل والترويج له عبر seo وإعلانات فيسبوك والبريد الإلكتروني | عشوائيات

 

شرح فكرة الربح من الانترنت: الخلاصة اللي لازم تعرفها - عشوائيات

من كام يوم كنت قاعد مع واحد من أصدقائي من أيام المدرسة اسمه أحمد، وكان بقالنا كتير مشفناش بعض، فكان كل واحد منا عايز يعرف التاني بيعمل إيه في حياته.

أحمد صديقي أول ما عرف أني بشتغل على الانترنت، لقيت في عينه لمعة، وكأنه ماصدق سمعني أقول كدة… وهنا بدأت الأسئلة تمطر:

• هو ازاي الناس بتشتغل على الانترنت؟
• ايه هو الشغل الموجود على الانترنت، برمجة و تصميم وكدة ولا في حاجة تانية؟
• طب ازاي اي حد ممكن ياخد فلوسه؟
• ايه هي الكورسات والشهادات اللي لازم أي حد يحصل عليها علشان يشتغل على الانترنت؟

وغيرها كتير من الأسئلة اللي بتدور في ذهن اي حد ميعرفش فكرة الربح من الانترنت ماشية ازاي، فلو انت واحد من الناس دي أحب أقولك إنك في المكان المناسب.

في الكام دقيقة اللي جاية هتعرف التالي:

• فكرة الربح من الانترنت بشكل عام.
• مجالات الربح من الانترنت المختلفة.
• ازاي تبدأ في الربح من الانترنت خطوة بخطوة بشكل عملي.

مش كدة وبس، انت كمان هتلاقي إجابات على كل الأسئلة اللي ممكن تخطر على بالك عن الربح من الانترنت زي:

• ايه أفضل الطرق للربح من الانترنت بالنسبة للمبتدئين (وخصوصاً الطرق المجانية)؟
• ازاى استلم فلوسي من الانترنت بطرق مضمونة ومتاحة في بلدي؟

علشان كدة عايزك تقرأ المقال كله بتركيز شديد… وإياك تضغط على  أي رابط من الروابط اللي هتلاقيها إلا بعد لما تخلص علشان تنفذ الخطوات صح.

كفاية كدة بقى مقدمة ويلا ندخل في التفاصيل!

إيه هي فكرة الربح من الانترنت؟

طبعاً احنا مش هنضيع وقتنا في الكلام عن شبكة الانترنت نفسها وبتشتغل ازاي، خصوصاً وانها معلومات اغلبنا يعرفها كويس، كل اللي محتاج أنك تعرفه في النقطة دي؛ أن الانترنت ده عبارة عن أداة بتسرع عملية التواصل بين الناس في كل حاجة.

وقبل ما نكمل كلام على الانترنت خلينا نتكلم عن الشغل عموما… لأنك هتتفاجئ لما تعرف أن الشغل على أرض الواقع هو نفسه الشغل على الانترنت مع فارق بسيط جداً.

العمل على أرض الواقع وعلى الانترنت

إيه هي أهم أنواع الوظائف أو العمل اللي أغلبنا يعرفها؟

• وظيفة علشان تنفيذ مهمة محددة براتب ثابت (خدمة عملاء – سكرتارية – إدارة).
• وظيفة تعتمد على علوم محددة (طب – هندسة – محاسبة – محاماة – الفن الصناعي).
• التجارة بمختلف أنواعها.
• صناعة المحتوى (الجرايد – الإذاعة – التلفزيون – الترفيه).
• المشروعات اللي بتخدم كافة الصناعات والمجالات (التسويق – النقل – الأنظمة والبرامج المساعدة – البنوك).
• الأعمال الوسيطة مثل (السمسرة – خدمات التأمين).

طبعاً هيكون من الصعب جداً إننا نحصر كل أنواع الوظائف أو مجالات العمل في قائمة واحدة، بس أعتقد أنك متفق معايا أن هي دي أغلب أنواع العمل على أرض الواقع.

كل الوظائف اللي فاتت دي بتعمد على التواصل بين اللي هيبيع وهيشتري، بين صاحب الخدمة والشخص اللي هيستفيد من الخدمة دي.

الانترنت بقى بيسهل عملية التواصل بين الناس، انت ممكن تمسك موبايلك وتتفرج على تيشرت عاجبك وتختار لونه ومقاسه وبكليك واحدة التيشرت يجيلك قدام البيت.

خلينا نبص كدة بعمق شوية على المثال اللي فات ده:

• صاحب المصنع أو المحل اللي بيبيع التيشرت استغل الانترنت في أنه يتواصل مع الزباين بشكل أسرع.
• الموظف اللي شغال في المبيعات أو خدمة العملاء بيتعامل مع الناس، ويرد على استفساراتهم  بطريقة أسهل.
• الشخص المسئول عن التوصيل بيجيله شغل أكتر وبطريقة سهلة ومريحة.
• أنت كعميل بتستفيد أنك بدل ما هتحتاج تلف وتدور بالساعات علشان تشتري حاجة… ممكن في دقايق معدودة تلف في كل المتاجر الإلكترونية وتشوف مئات من المنتجات وانت في مكانك.

الإضافة اللي عملها الانترنت أن بقى فيه نوع جديد من الوظائف وهو المتعلق بالبرمجة… فمثلاً فيه شخص شغلته أنه يعمل المتجر أو التطبيق اللي انت استخدمته عشان تشتري التيشرت.

وحتى الشغل ده كفكرة مش جديد… زي ما فيه ناس مسئولة أنها تصمم وترتب المحلات التجارية وعرض المنتجات، و أنها تعمل نظام للبيع والشراء وتسجيل المنتجات… فيه ناس شغلتها تعمل كدة برده بس باستخدام الكومبيوتر…

علشان كدة نقدر نقول أن كل الوظائف اللي موجودة على أرض الواقع هي نفسها الوظائف الموجودة على الانترنت.

هي دي فكرة الربح من الانترنت اللي عايزك تعرفها كويس و تستوعبها علشان تعرف تستفيد من الانترنت… خليني أوضحلك أكتر ببعض الأمثلة الإضافية:

• المهندس اللي عنده مكتب تصميمات؛ بدل ما يلف بنفسه على الناس علشان يجيب عملاء، ممكن يتواصل مع المهتمين على الانترنت ويتفق على الشغل ويبعته وياخد فلوسه عن طريق الانترنت.
• الكتاب والصحفيين بدل ما تكتب على ورق في جريدة ممكن تكتب على موقع أو مدونة… والناس اللي بتعمل أفلام قصيرة و اسكتشات كوميدية، ممكن تعمل نفس الشيء بس على اليوتيوب بدل التلفزيون والمسرح.
• المدرسين وأصحاب الخبرات بدل ما تروح لسنتر علشان تقابل الطلبة وتشرحلهم، ممكن تعمل نفس الشيء وتبيع الكورسات دي أونلاين.

زي ما قلتلك قبل كدة، الشغل على الانترنت هو هو الشغل على أرض الواقع، مع الفرق أنك بدل ما بتتعامل مع الشخص وجهاً لوجه… هتتعامل معاه من خلال شاشة الموبايل أو الكومبيوتر.

وعلشان تستغل الانترنت كويس؛ لازم تبقى فاهم ازاي الانترنت ممكن يساعدك حسب ظروفك (دراستك – شغلك – شغفك – خبرتك) وهو ده اللي هنتعرف عليه في العنصر اللي جاي.

ازاي تبدأ في الربح من الانترنت

لو عندك مطعم تفتكر إيه أحسن حاجة ليك… أنك تبني تطبيق تخلي الناس تشتري الأكل من عليه، ولا أنك تستغل التسويق على مواقع السوشيال ميديا في أنك تجيب زباين أكتر؟!

لو انت بتقدم أي خدمة لأصحاب الشركات والمصانع (تصميم – صيانة – تسويق) هل أنك تتعلم ازاي تدور أونلاين عن الناس دي بحيث تقنعهم بشغلك أفضل مش حاجة كويسة ومفيدة؟

لو عندك موهبة معينة (رسم – برمجة – كتابة) تفتكر هيحصل ايه في حياتك لو اتعلمت من خلال الانترنت وطورت مهارتك، فيا اما هتلاقي وظيفة كويسة بمرتب مناسب أو هتكسب من العمل على الانترنت نفسه؟

لو بتشتغل مثلاً مندوب مبيعات أو مهمتك أنك تساعد شركة أو مصنع أنه يبيع أكتر… تفتكر هيحصل ايه في شغلك لو اتعلمت أصول التسويق عبر الانترنت بكل الطرق الممكنة؟!

انا عايزك تفكر في الانترنت زي الميكروفون بالظبط، الميكروفون شغلته انه يكبر الصوت… والانترنت لازم يكون شغلته بالنسبالك أنه يكبر الحاجة اللي معاك بالفعل.

علشان كدة الخطوة الأولى اللي للأسف مش ناس كتير بتعملها قبل ما تفكر في الربح من الانترنت؛ هي أنها تفكر في الموارد اللي معاها بالفعل، الحاجات اللي ممكن تستغل الانترنت في أنه يكبرها.

خطوات الربح من الانترنت

انا عايز ارسم قدامك خريطة طريق واضحة عملية لمعرفة كل حاجة لازم تعملها علشان تربح من الانترنت… وهو ده اللي هقولك عليه دلوقتي خطوة بخطوة.

1. اعرف الموارد اللي تمتلكها

زي ما قلتلك قبل كدة، الخطوة الأولى أنك تفهم الإمكانيات والموارد اللي تمتلكها، كل حاجة تعرفها أو بتحبها أو خبير فيها ممكن تكون مصدر دخل هائل ليك.

وحتى لو معندكش خبرة سواء من العمل أو التعليم، ممكن تستغل شغفك أو عاداتك أو المهارات اللي بتميل ليها علشان تتعلمها… و هقولك دلوقتي ازاي تعمل ده خطوة بخطوة.

في مقال تفصيلي بعنوان (ماذا أحتاج لكي ابدأ في الربح من الإنترنت)، هتلاقي فيه تدريب عملي يساعدك على اكتشاف الموارد الخاصة بك بشكل هيخليك تتفاجئ من نفسك.

ياريت تطلع عليه – بس أكيد بعد لما تخلص هنا الأول.

2. اعرف هدفك من العمل على الانترنت

أي حاجة لازم تعملها لازم تبقى عارف أنت بتعملها ليه، فيا ترى أنت عايز تربح من الانترنت علشان:

• تحصل على دخل إضافي يساعدك على تحمل أعباء الحياة.
• الحصول على رأس مال لبناء مشروعك الخاص.
• بناء مشروع خاص بك للربح على الانترنت.
• الحصول على دخل ثابت من الانترنت حتى تترك وظيفتك.

تحديد الهدف هيساعدك تختار الطرق الأسرع والأنسب ليك للربح من الانترنت، كمان هيخليك تتعامل مع كل طرق الربح من الانترنت المختلفة بحذر أكبر.

3. اتعرف على الفرص المتاحة عبر الانترنت

يا ترى ايه هيا طرق الربح من الانترنت أو المجالات المختلفة اللي ممكن تشتغل فيها علشان تربح من الانترنت… كل ما عرفت أكتر كل ما اخترت الطريقة أو الطرق اللي تناسب الموارد بتاعتك.

بشكل عام مجالات الربح من الانترنت هي:

• مجال التسويق الرقمي.
• مجال التجارة الإلكترونية.
• مجال العمل الحر.
• مجال صناعة المحتوى الرقمي.
• مجال الفوركس أو تداول العملة.
• مجال العملات الرقمية.

طبعاً كل مجال من المجالات السابقة فيه فرص ومواضيع مختلفة تقدر تستغلها للربح، وكل ده احنا عملنا عنه أدلة مفصلة بتشرحه خطوة بخطوة.

بس علشان بجد تعرف الفرص المتاحة للربح من الانترنت أنصحك أنك تطلع على الأدلة الشاملة التالية:

• طرق الربح من الانترنت (هنا هتلاقي الطرق الرئيسية والأشهر والأضمن للربح من الانترنت).
• كيفية الربح من الانترنت مجاناً (هنا هتتعرف على طرق كتير جداً تقدر تبدأ بيها مجاناً بالخطوات العملية).
• أفضل المواقع للربح من الانترنت (هنا هتتعرف على أفضل 23 موقع الكتروني ممكن تستغلها علشان تربح من الانترنت)

أنصحك أنك تبص بصة كدة على كل الأدلة الشاملة اللي فاتت دي… هتلاقي نفسك عارف كل حاجة عن فكرة الربح من الانترنت بشكل عملي.

وكل المعلومات دي هتساعدك تطبق الخطوة اللي جاية بشكل صحيح.

4. اتعلم أساسيات الربح من الانترنت

أكيد أنت عايز تعرف ازاي تستلم أرباحك من الانترنت أو تدفع فلوس على الانترنت بكل الطرق المختلفة صح؟

في مشاكل وعقبات ممكن تقف في طريقك مهما كانت الطريقة اللي هتشتغل بيها للربح من الانترنت، علشان كدة عملنا في عشوائيات دليل شامل اسمه (أساسيات الربح من الانترنت).

الدليل ده هتلاقي فيه شروحات بالتفصيل علشان تتعامل أونلاين، وتستلم فلوسك، وتحل أي مشكلة تقابلك بمنتهى السهولة.

لازم تطلع عليه، لأن أغلب المشاكل والعقبات اللي بتقابل أي مبتدئ، واللي بتخليه يقف أو يفشل هتلاقي حلها موجود في الدليل ده.

وكمان لو حابب تطلع أكثر وتخلي عندك خلفية أوضح عن الربح من الانترنت؛ أنصحك أن تتعرف على مفاهيم الربح من الانترنت.

لأنك هتلاقي كلمات ومصطلحات زي:

• النيتش (Niche)
• نسبة التحويلات (Conversion Rate)
• الهدف المطلوب تحقيقه من العملاء (Call To Action)

وغيرها من المصطلحات الموجودة في كل مجالات الربح من الانترنت تقريباً، واللي لازم تتعرف عليها… واللي إن عرفتها هتخليك تتفوق على غيرك من المبتدئين وتحقق أرباح أكتر.

5. اختار الطريقة المناسبة ليك وابدأ فيها

في أول تجربتي في العمل على الانترنت بدأت بأي طريقة تقع قدامي، وده خلاني أصيع وقت وفلوس وتروح عليا فرص كتيرة جداً… علشان كدة مش عايزك تغلط نفس الغلط.

في الدليل اللي قلتلك عليه قبل كدة (ماذا أحتاج للربح من الانترنت)، لو قرأته كله هتلاقي فيه تمرين عملي على ازاي تختار الطريقة المناسبة للربح من الانترنت بالنسبالك.

لازم تطلع عليه… لو هيا دي الحاجة الوحيدة اللي خرجت بيها من المقال ده بعد ما فهمت فكرة الربح من الانترنت نفسها هكون مبسوط جداً.

6. حاول بكل الطرق أنك توصل لربح دولار واحد فقط

أيوة زي ما انت شايف كدة، دولار واحد بس، لو عرفت ازاي تكسب دولار واحد هتعرف ازاي تكسب خمسة وعشرة وألف بعد كدة.

علشان كدة في البداية مش عايزك تركز أو تفكر في مئات الدولارات اللي ممكن تحققها من الطريقة اللي انت اخترتها… ولا تختار طريقة علشان ارباحها أكبر من غيرها.

لو فكرت بالطريقة دي غالباً هتفشل فشل كبير جداً… وحتى لو نجحت فأنت مش هتستمر، صدقني كل اللي بقولهولك ده عن خبرة وتجربة.

كل اللي عايزه منك أنك تستخدم كل طاقتك في انك تحقق أصغر مكسب ممكن من الطريقة اللي اخترتها… وبعد كدة كرر اللي عملته تاني علشان تكسب تاني.

وبعد كدة دور ازاي بنفس المجهود تكسب أكتر، هتلاقي نفسك مع الوقت بتطور من نفسك وتتعلم بسرعة كبيرة جداً.

7. إياك تستسلم

انا عايزك تعرف أن فيه ناس بتكسب من الانترنت من بيع فضلات الحيوانات، وغيرهم بيكسبوا لمجرد أنهم بيعملوا فيديوهات بالموبايلات أقل حاجة يتقال عنها أنها فيديوهات بسيطة وبدائية جداً.

فيه ناس بتشتغل عشر ساعات علشان تحقق 50 دولار، وناس بتشتغل ساعة واحدة بس وبتكسب 500 دولار، وكلهم مبسوطين بشغلهم، و النتايج اللي بيحققوها على حسب إمكانياتهم و وقتهم.

علشان كدة انا مش عايزك تستسلم… ممكن متكسبش من أول يوم أو اسبوع أو حتى شهر… ممكن لو بدات بطريقة فيها فلوس تخسر شوية من راس مالك.

كل ده مش مهم، المهم أنك تصدق أنك تقدر، وأنك هتنجح طالما بتتعلم من أخطائك وبتطور من نفسك… علشان كدة حتى لو حاسس أن الطريقة اللي اخترتها صعبة شوية، أوعى تستسلم.

حاول وابحث ودور واسأل… نصيحتي هي انك على الأقل لازم تدي الطريقة اللي اخترتها 3 شهور، ودا قبل ما تقرر أنك تغيرها وتشوف طريقة تانية.

وحاجة كمان مهمة جداً لازم تحطها في اعتبارك، وهي أنك متقارنش نفسك بحد… اوعى تقارن بينك وبين واحد بيشتغل على الانترنت بقاله فترة.

وكمان حط في اعتبارك أن كتير من الناس وصلوا لدرجة معينة بعد شغل وتعب و مجهود و وقت طويل نوعاً ما… فاياك تستعجل وتحس أنك أقل منهم… أنت لسة في أول الطريق.

الخاتمة

انا مش عايز أطول عليك أكتر من كدة، وأعتقد دلوقتي أنك عرفت ايه هي فكرة الربح من الانترنت، و ازاي تبدأ على الفور باستغلال واحد من أهم اختراعات البشرية عشان تحسن من حياتك.

لو عندك أي سؤال سيبه في التعليقات وهنرد عليك في أسرع وقت ممكن.