اعرف ازاي تشتري من مصر بكل سهولة ؟
الشيخ البعيد سره مش باتع، يعني مش اول ما تفكر في التجارة تقول انا عاوز اشتري من الصين ولا من امريكا، فكر الأول في مصر لإنك هتلاقي فيها منتجات كتير كويسة هتقدر تروجها وتبيع منها، يعني شغلك هينجح وفي نفس الوقت هتساعد في نمو إقتصاد بلدك، هنقولك النهاردة في المقال ده ازاي تعمل كدة وهيكون المثال اللي هناخده النهاردة عن الملابس بشكل كبير وشوية منتجات تانية.
أولاً الملابس :
المصانع :
لو حابب تشتري ملابس هتدخل على موقع دليل المصرية وهتعمل بحث على مصانع الملابس وهتكتب عناوين المصانع اللي جنبك لإنك ممكن تلاقي مصنع في الشارع اللى وراك وانت متعرفش، وعلى فكره ممكن تاخد نص دسته بس من مصانع كتير لإن الكل عايز يبيع ،اهم حاجة وانت بتشترى تركز على نقطتين :
- شفت مثلاً تيشرت ب 30 جنيه جملة، اسأل نفسك لو انا عرضته ب 30 جنيه هيتخطف ويبقي لُقطه ولا الناس هتستغلاه؟؟ لو حسيت ان سعر جملته لُقطه اشتريه، طبعًا السبب واضح، انك متخسرش لو معرفتش تبيعه بمكسب .
- لازم تتفق مع المصنع او تاجر الجمله على استبدال الديفوهات خلال 3 ايام، دول اهم نقطتين لازم تخلي بالك منهم لما تشتري اي بضاعة غير كده بيبقي فيها مخاطره لو أهملت النقطتين دول وممكن تخسر كتير.
أماكن بيع الملابس جملة غير المصانع :
– المكاتب اللي في العمارات اللى في ميدان العتبه، وبالنسبة للبيجامات المصرى والتركى اللى الناس بتعلن عنها كتير معظمها بمول القدس هناك .
– الموسكى وما أدراك ما الموسكى، هناك هتلاقي كتير من خيرات الله، زي الطرح، اللانجرى، المستورد، المصرى، وكمان لبس خروج او بيت.
– شارع الترعه البولاقيه بعد ماتطلع من نفق شبرا هتلاقي محلات ومكاتب على اليمين وعلى الشمال، المكاتب داخل العمارات طبعاً، هتلاقي هناك معظم الملابس وتقريبًا نفس أسعار الموسكى، الميزه إن المكان مش زحمه اوى ودى ميزه كبيره لكن طبعاً الموسكى أكبر بكتير وبيكون دايماً زحمة يعني لو هتروح روح من الصبح بدري.
– القنطره فيها لبس تحفة مستورد بس مشكلتها إنها بعيدة شوية وتعتبر سفر، بس لو كنت ساكن قريب منها فمينفعش تفوتها ومتروحهاش.
– المحله معظم المصانع لها منافذ توزيع هناك، لو انت في بلد جنب المحله هيكون محبب إنك تشترى منها اما لو بعيد فممكن تشوف مكان تاني قريب ليك غيرها.
– اكيد في أماكن كتير تانيه في المحافظات لكن طبعاً دي أهم الأماكن المشهورة والمعروفة للكل.
مصانع التصدير :
ملابس كانت المفروض تتصدر و اتبقى منها كمية صغيرة متصدرتش لسبب او لآخر.
الإستوكات :
ودى نوعين، الأول مستعمل ومغسول ومتوضب والتانى جديد لكن موديلات سنه او سنين سابقه او بها ديفوهات.
العبايات :
هتلاقوا أغلب الورش والمصانع في منطقه الوراق بجوار سنترال الوراق.
ثانياً المنتجات اللي بتتباع ب 2.5 جنية :
- هتلاقيهم في الموسكي.
- درب السعادة.
- الفجالة.
- النزهة.
ثالثاً الشنط الحريمي :
معظم المستوردين والتجار ومنافذ توزيع المصانع في درب آيه بباب الشعريه، المكاتب في العمارات فوق.
رابعاً الأدوات المنزلية :
أغلب المستوردين والموزعين للمصانع المصرية بأبو النمرس بعد المنيب بالجيزه .
خامساً معدات المطاعم :
لو معاك اى مبلغ بسيط ممكن تفتح مكان صغير جداً او تأجر مكان صغير وتنزل باب الشعريه الشارع اللى قبل مديرية أمن القاهرة هتلاقي فيه كل اللي هتحتاجه وبأسعار مناسبة جداً مكنتش تحلم بيها.
سادساً الخرز ومستلزمات الإكسسوارات الحريمي :
ودي موجودة في الأزهر في حارة العزيزية او شارع المعز.
سابعاً طرح المحجبات :
موجودين في أول شارع بورسعيد بالموسكى، هتلاقي هناك محلات جنب بعض كتير عندهم أحدث الموديلات، وكمان في الموسكي، وكمان في مصانع ممكن تجيب أرقامها من النت بسهولة وتتواصل معاهم.
تعليقات
إرسال تعليق