هل كل الربح واحد في مجال الـ Drop Shipping ولا فيه حد هيكسب أكتر من التاني ؟
طبعاً نسبة الربح متفاوتة، وعشان تضمن إنك هتستفيد منه أقصى إستفادة لازم تعرف تختار المنتج اللي هتبيعه بشكل صحيح ويكون متوفر فيه شروط معينة، تعالى نعرفها دلوقتي :
منتج مألوف ومعروف للناس
مش لازم تختار منتج فريد من نوعه إختار حاجة مألوفة بس العبها صح، (مثال) لو هتبيع على أمازون واخترت فرش أسنان ولقيت المنافسين على الموقع تقييمات العملاء عندهم جيدة ،بيهتموا بالـ SEO وبيضخوا فلوس في الإعلانات الممولة يبقى ساعتها المنتج ده فرصة كويسة واختيار مناسب.
السعر الجيد
اختار منتج رينج تسعيره متوسط عشان يكون مناسب معاك كبداية لتحقيق مبيعات يعني خليك في رينج من 50$-100$ أو 150 ج لحد 300 ج، لإنه هيحقق معاك نمو كويس كمبيعات وفي نفس الوقت رينج متوسط أو قليل لصاحب قرار الشراء.
بيع منتج بيحل مشكلة
ركز دايماً في إختيارك على المنتجات اللي بتحل مشكلة عند العميل حتى لو حاجة متخصصة أو في مجال معين، وهقولك مثال: Kyle Kirkpatrick رياضي كبير كان دايماً نفسه يفضل يسمع مزيكا وهو بيتمرن او بيجري، او بيتشقلب على الترامبولين مالوش فيه.
إصطاد الفرصة من الإحتياج ده وعمل Decibullz اللي بقى براند سماعات مشهور، عشان حدد مشكلة وابتكر حل ليها وتقدر تزور موقعهم وتعرف أكتر عن نجاحهم المميز.
البساطة
منتجك مش لازم يبقى حاجة معقدة ممكن تختار منتج بسيط لكنه مؤثر بدرجة كبيرة وممكن تلاقي فرص لمنتجات في:
- تطوير مميزات منتج موجود اصلاً.
- سوق جديدة منافسينك مش ملتفتين ليها.
- تسويق مختلف لمنتج معروف.
منتج معروف بالنسبالك
اختار منتج عندك شغف بيه أو فاهمه بشكل كويس، ده هيساعد إنك توصل الرسالة التسويقية بتاعته بأفضل شكل وبالتالي هيكون فيه مبيعات وربح على العكس لو كان المنتج مش مفهوم بالنسبالك فهتقدر تفهمه للجمهور ازاي او تختارهم صح من الأساس ؟
التخصص
دور على المنتجات المتخصصة واللي غالبًا بتنجح في التجارة الإلكترونية لإن السر هنا بيكون في معدل التحويل العالي للعملاء من محتملين لفعليين والبيع لشريحة محددة بيمثل فرصة بيزنس هايلة لإنك بتقدم منتج بيحل مشكلة لأشخاص شغوفين ومهتمين بيه وعشان متبقاش محتار في التفكير هقولك أمثلة لمنتجات من النوع ده:
- أكل صحي.
- خواتم رجالي.
- نوت بوك ومفكرات
- أكل الحيوانات
- إكسسوارات الكاميرات
- أجهزة الكترونية
- مستلزمات أطفال
مؤشرات جوجل
خلي اختيارك يبقى لمنتج عليه طلب وتقدر تعرف ده من مؤشرات جوجل البحثية الموجودة على الـ Keyword Planner وخلي تركيزك على المنتجات اللي كلمات البحث الخاصة بيها أقل من ألف مرة بحث فالشهر ولو على أمازون اختار المنتجات اللي عدد التقييمات الخاص بيها أقل من 100 تقييم.
المتابعة
اشترك في القائمة البريدية الخاصة بالمجلات والمواقع العالمية المشهورة في مجال المنتج اللي اخترته لإن متابعتك لتحديثات المواقع والمجلات دي هتعرفك اتجاهات الطلب المحلية والعالمية رايحة فين.
إختيار الإسم
بالنسبة لإختيار اسم المتجر بتاعك/الصفحة هتحتاج يبقى مختلف وعشان النقطة دي بتبقى صعبة هقولك إن الإسم لازم يتميز بمجموعة من الخصائص :
- سهل النطق.
- يكون كلمة أو 2 بالكتير جداً 3.
- لو اتقال في دوشة يلفت الانتباه.
- مناسب لنوع المنتج.
- مش متعارض مع اسم براند مشهور.
- يكون متاح كإسم دومين.كوم أو اسم صفحة على مواقع التواصل.
ازاي تبدأ تشتغل في الـ Drop Shipping ؟
تعليقات
إرسال تعليق