اعرف مميزات وعيوب الـ Drop shipping
النت متعملش عشان نتابع الأخبار او عشان نكلم اصحابنا ونهزر معاهم بس، من مميزات الإنترنت الجبارة إنه ممكن يجبلك فلوس لحد عندك عن طريق التجارة الإلكترونية، وفيه قدامك مجالين ممكن تختار واحد منهم لو عاوز تتاجر وإنت معندكش اي رأس مال، وهما الـ Drop shipping او الـ Affiliate marketing.
تعريف الـ Drop shipping
بكل بساطة هو إنك تعمل متجر الكتروني خاص بيك وتعرض منتجات موجودة على مواقع التسوق والتجارة الإلكترونية المختلفة وأشهرهم في مصر (سوق-نون-جوميا) بسعر أعلى من سعرها الحقيقي، وعند تصفح الزائر متجرك وطلب اي منتج تشتريه وتبعته على بيانات المشتري وفرق السعر يكون هو الربح بالنسبة لك، هنا أنت مجرد وسيط بين البائع والمشتري.
هتعرض المنتجات دي فين ؟
على صفحة الفيس بوك بتاعتك أو موقعك، بعدها تبدأ تختار منتجات من المواقع الكبيرة زي علي بابا او امازون وتنقل المنتجات اللي عاوز تسّوقها وتعرضها في متجرك وتنقل بيانات المنتج ووصفه وصوره، ولما يجيلك أوردر وتتم عملية البيع تشتري المنتج من موقعه الأصلي وتبعته مباشرة على بيانات المشترى.
متطلباته :
- إنشاء متجر إلكتروني سواء صفحة فيس او انستجرام او موقع ويب.
- توفير طرق دفع مثل حساب Paypal، فوري، فودافون كاش أو أي وسيلة دفع من الموجودين على الموقع اللي بتجيب منه المنتجات يعني تعرف سوق متاح عليه ايه وسائل دفع أو نون وهكذا.
- تجمع متاجر التسوق اللي هتبقى مصدرك وتختار المتاجر الأكثر مصداقية وثقة.
- تشتغل تسويق للمنتج اللي اخترته من خلال مواقع التواصل الاجتماعي أو حملات إعلانية مدفوعة على فيس بوك ادز أو جوجل أدوردز أو غيره من طرق التسويق.
مميزات الـ Drop shipping
- تقدر تبدأ في أي وقت بدون رأس مال كبير.
- تنوع المنتجات اللي تقدر تسوقها.
- سهولة توصيل المنتج للمشتري.
- زيادة نسبة الأرباح.
- مش مرهق ابداً ومش هتحتاج تدير المنتجات وتنظمها لو كانت عندك، انت بس هتعرضها.
- مش هتحتاج يكون عندك موقع ويب إنت ممكن تبيع على المواقع الكبيرة على طول زي امازون.
عيوب الـ Drop shipping
- مش سهل تلاقي وكيل شحن موثوق.
- مش بتتحكم في اي حاجة غير لما بتختار المنتجات اللي هتعرضها او هتحدد سعرها.
- ممكن يكون فيه مشاكل محتملة في خدمة العملاء.
- الربح هيكون منخفض لو كنت مختار منتجات اصلاً غالية وفيها تنافس عالي في السوق.
- لازم يكون عندك مهارات معينة وفاهم إزاي تستخدم السوشيال ميديا، ازاي تحمل الصور على الموقع، ازاي تقصها، ازاي تكتب عليها جمل تشد العين.
- ممكن احياناً يحصل لغبطة من عند البائع الأساسي ويبعتلك منتجات غير اللي انت طالبها، عشان كدة دايماً لازم تتأكد من مصداقية البائع اللي هتتعامل معاه.
- فيه منصات بيكون عليها التنافس شديد زي امازون، فعشان كدة هتضطر تقلل سعرك واللي هيكون نتيجته إنك مش هتكسب كتير.
إزاي تنجح في مجال الدروب شيبنج ؟
- حاول تقديم أسعار مناسبة لتحفيز المشترى على الشراء.
- تأكد طول الوقت من توفر المنتج في متجره الأصلي قبل التسويق ليه.
- حاول التركيز على المناسبات والأعياد والتسويق لمنتجات مناسبة ليها لتحقيق عائد أكبر.
- اختار دايما السلع اللي ليها تقييم عالي وfeedback ممتاز.
- اصبر وجرب وحاول أكتر من مرة، وما تفكرش في المكسب من أول يوم.
لو عندك اي سؤال بخصوص المجال وازاي تقدر تبتدي فعلياً فيه ممكن تبعت لينا كل إستفساراتك على صفحتنا على الفيس بوك وهنرد عليك في أقرب وقت ممكن.
تعليقات
إرسال تعليق