اللي بيبيع ويجري عمره ما بيعيش ليه زبون، وإن اشترى مرة مش هيشتري التانية، عشان تكسب زبونك وتضمن إنه خلاص بقى في جيبك بمعنى أصح لازم يكون عندك سياسة واضحة لإسترجاع المنتجات، وطبعاً لو معملتش كدة وكان فيه عميل محتاج يرجع منتج لسبب ما، مش بس هتخسره ده ممكن يعمل منشورات على السوشيال ميديا او يدخل يعلق على صفحتك ويخلي عملاء كتير تخسرك، وممكن كمان يشتكيك في جهاز حماية المستهلك ويقفلك التجارة خالص، متخيل ؟
عشان كدة هنكلمك على الموضوع ده النهاردة، وهنعرفك تعمل ايه بالضبط :
خلي سياسة الإسترجاع واضحة ومكتوبة بلغة سهلة وصياغة مفهومة وحدد
- المنتجات القابلة للإسترجاع والغير قابلة للإسترجاع.
- المدة الزمنية المسموح فيها بالإسترجاع.
- المطلوب من العميل كخطوات عشان طلب الإسترجاع.
- خلي سياسة الإسترجاع الخاصة بمنتجاتك ما تركزش على رضا العميل وبس خليها ميكس من الـ 3 بنود اللي فاتوا عشان تبقى عامل محفز للعميل على الشراء بدون شكوك وبكدة هو مش هيرجع المنتج إلا في حالة الضرورة القصوى، وده بردو هيدي أهمية وقيمة للمنتج بتاعك لإنه مش هيقدر يرجعه في اي وقت واي حالة.
- خليك جاهز بالتصرف اللي هيتعمل ساعة الإسترجاع وده بناء على مجال منتجاتك وعلى كونك موزع ولا تاجر ولا ايه تحديداً، وإعرف الأسباب اللي دفعته إنه يبدل المنتج وحللها وأوصل لأساس حصولها عشان متحصلش في المستقبل.
- فرضاً المنتج يستحق أنه يرجع فعلاً وفقاً للشروط والأسباب الموضحة، وقتها لازم تكسب ولاء العميل بسرعة و تبعتله تمن المنتج عشان توصل ليه إنطباع إن الإسترجاع سهل زي الشراء طالما الشروط متحققة، عشان تبقى الرسالة اللي واصلة إن أنت بتراعي العميل في مختلف الظروف مش وقت الشراء بس .
قانون حماية المستهلك الجديد
وإنت قاعد وبتحط كيفية إسترجاع المنتجات عندك لازم تحط قدامك حاجتين، تشوف قانون حماية المستهلك الجديد وتعرف بينص على ايه عشان البنود اللي هتحطها تبقى متوافقة ومتماشية معاه.
- المادة (17) من القانون رقم 181 لسنة 2018
بيقول إن المستهلك ليه حق فى إستبدال السلعة أو إعادتها مع إسترداد الفلوس، بدون ما يقول أى أسباب ومن غير تحمل أى نفقات خلال 14 يوماً من تسلمها، فيه 5 حالات هيمنعوا المستهلك إنه يرجع المنتج بالشكل ده :
لو كانت طبيعة المنتج أو خصائصه أو طريقه تعبئته أو تغليفه تمنع إستبداله أو إرجاعه، أو يستحيل رجوع المنتج لحالته عند الشراء، ولو كان المنتج من المنتجات الإستهلاكية القابلة للتلف السريع، ولو المنتج مش بنفس حالته الأصلية، وإذا كان من المنتجات اللي بتتعمل بالطلب، والكتب والصحف والمجلات، والبرامج المعلوماتية واي حاجة شبهها.
- المادة (21)
يحق للمستهلك خلال 30 يوماً من تسلم المنتج إستبداله أو إعادته مع إسترداد الفلوس وده لو المنتج كان فيه عيب او غير مطابق للصفات اللي انت بعتهاله بيها.
- المادة (18)
المورد لازم يحط بيان يتضمن حقوق المستهلك فى الإستبدال والإسترجاع المُعتمدة من جهاز حماية المستهلك فى مكان ظاهر داخل أماكن عرض المنتجات او بيعها، وحظرت على المورد تعليق بيع المنتجات على شرط مخالف للعرف التجارى، أو شرط بيع كمية معينة، أو ربط البيع بشراء منتجات أخرى.
تعليقات
إرسال تعليق