أسست متجرك واخترت منتجاتك وخلاص جيه دور إختيار شركة الشحن، واللي لو اخترتها صح هترتاح جداً وشغلك هيمشي زي السكينة في الحلاوة زي ما بيقولوا، أما بقى لو اخترتها غلط فبنقولك إعرف إنك مش هتفضل كتير في المجال وهتطلع منه خسران كمان، إنت متخيل ؟
وعشان كدة هنقولك على شوية خطوات وبنود لازم تعملها وإنت بتتفق مع شركة الشحن :
- اتفاوض وإعرف أسعار شركات كتير:
شركات الشحن المختلفة ليها باقات تسعير متنوعة اعتماداً على كم المنتجات المطلوب شحنها، لو بتتعامل في كم منتجات كتير شهرياً ده هيديك باور للتفاوض والوصول لأنسب أسعار، ولو حجم تعاملاتك قليل متقلقش عشان زي ما فيه بيزنس صغير زي اللي بتبدأ فيه زيه في مجال الشحن هيناسب حجم الشغل عندك.
- إلعبها صح واستفيد من المشاركة:
البيزنس بتاعك محتاج خدمات شحن وموردينك اللي بتجيب منهم المنتجات زيك طيب ما تخليهم يشحنوا على الأكونت بتاعك في شركة الشحن (بالإتفاق معاهم طبعاً)، ده هيخلي حجم التعامل كبير وبالتالي باقة أسعارك هتقل مع شركة الشحن وفي نفس الوقت هيقلل عليك تكلفة الشحن اللي بتدفعها للموردين.
- قلل تكاليف التغليف على نفسك واتعامل مع مزود خدمة التغليف الخاص بشركة الشحن اللي اتعاقدت معاها عشان يبقى تعاقد شامل وبالتالي تكلفته تبقى أقل.
- إعتمد على الشركات الموجودة في نطاق منطقتك ونطاق التوصيل الخاص بيك عشان تختصر المسافات ويبقى التحكم في الوقت أسهل.
- في شركات شحن بتقدم تخفيضات كويسة على الباقات اللي فيها نسبة مدفوعة مقدماً، بس دي خطوة تعملها وأنت مقدر حجم الأوردرات شهرياً عشان متكونش تكلفة زايدة عليك
- إعمل تأمين على الشحن بس مع شركة تأمين متخصصة بلاش نفس شركة الشحن عشان متزودش تكلفة البيزنس نفسه عليك، وده هيفيدك لو اتعرضت المنتجات لأي مشكلة وقت شحنها.
- إسأل على الباقات الشاملة في شركات الشحن لإنها هتفيدك في جزئيات مختلفة كخدمات فرعية وكسعر ومميزات إضافية.
- إسأل على أي شراكات بين شركات الشحن وبين الجهة الممثلة للبيزنس بتاعك اللي هي كمثال غرفة الصناعة والتجارة عشان الشراكات دي بتفيدك في التخفيض لو أنت عضو في الجهة دي.
أفضل 5 شركات شحن في مصر
شركة اراميكس
من أفضل الشركات المتميزة في مصر، من مميزاتها إنها عندها مخازن كبيرة وعدد مندوبين كتير جداً وبتوصل الطلبات بسرعة وكمان الطلب نفسه بتحافظ عليه وبيوصل سليم للعميل، ده غير إن أسعارها متوسطة لا هي غالية اوي او رخيصة اوي.
شركة مشاوير
من الشركات الرائدة جداً في مصر واللي بتلتزم بمواعيدها لأقصى درجة وطبعاً دي حاجة بيتمناها العميل وصاحب الشغل في نفس الوقت.
شركة Fedex
شركة مميزة جداً وإسمها لامع في مصر، وبتقدم مميزات كتير جداً وخدمات لعملائها عشان تضمن ولائهم ودي حاجة كويسة جداً لإنك ممكن تستفيد بالعروض دي وتوفر فلوس.
4.شركة اكسبريس كايرو
هي اصلاً شركة شحن عالمية وليها سمعة كويسة جداً وكمان بتمتلك مستودعات كبيرة في كل أماكن مصر، وبتتميز إنها بتنقل الأثاث بحرفية تامة ومن غير ما يتخدش خالص.
5.شركة Urgent
من الشركات الممتازة اللي هتخليك تتبع الشحنة بشكل كويس وبسهولة تامة وخطوة بخطوة، وبكدة هتقدر تطمن العميل وتعرفه ميعاد وصول شحنته بالضبط وده هيديه راحة كبيرة وهيحس إنك شخص دقيق ومتابعه ومهتم بيه.
تعليقات
إرسال تعليق