عارف لما بيقولك على حاجة إنها سلاح ذو حدين، اهو الإنستجرام بقى كدة، ممكن تنشر فيديوهات لنفسك او صور وتتابع البلوجر وتقضيها ضياع وقت، وممكن تعمل اكونت عليه خاص بشغلك وتروج المنتجات فيه وتكسب دهب، وده عشان معظم الناس بقوا مهتمين بالإنستجرام أكتر من اي ابلكيشن تاني، عشان كدة هنقولك النهاردة على خطة وطريق لازم تمشي عليهم عشان توصل وتحقق نجاح كبير.
الإنستجرام بينجح اكتر في منتجات الملابس والتجميل والديكور وأي منتج معتمد على المحتوى المرئي والمنتشر في مصر والخليج، وعشان تتأكد هنقولك على إستطلاع الرأي اللي عمله فيس بوك ولاقى إن 81% من المشاركين قالوا إن الإنستجرام ساعدهم على البحث عن المنتجات والخدمات، يعني هتكسب هتكسب لو دخلت فيه وابتديت تنشر منتجاتك.
نصائح تسويقية
- نزل بوستات المنتجات بإيقاع منتظم يعني ثبت يوم في الأسبوع أو 2 وبالتالي متابعة منتجاتك هتتحول لعادة عند جمهور الأكونت.
- وضحلهم المنتج مر بإيه لحد ما ظهر للنور قدامهم كأجواء وتحضير وغيره، استخدم الإستوريز عشان توضحلهم ما وراء الكواليس والمجهود المبذول في إعداد وتجهيز المنتجات.
- إعرض الإختيارات المتاحة كلها من المنتج (كل الألوان والأحجام والخامات) عشان يختاروا منها ويحسوا بالإهتمام من البيزنس بتاعك.
- خلي المنتجات على حاجة مستوية ومتصورة من زاوية علوية عشان يقدروا يشوفوا شكل المنتج بوضوح ويعرفوا هما هيخدوا ايه بالضبط.
- إنشر الصور والفيديوهات اللي عملائك نزلوها عن منتجاتك بعد ما تستأذنهم، لإن حركة زي دي هتشجع باقي العملاء على التعامل معاك لإن سمعتك طيبه.
- إعمل دليل لإستخدام منتجاتك وخليه على الاستوريز ويكون مفصل خطوة بخطوة.
- إستخدم اوبشن الأسئلة في استوريز الإنستجرام عشان تستقبل أسئلة الناس عن منتجاتك وتشجعهم على التفاعل بخصوصها وبالطريقة دي هيعرفوا أكتر عنها وهيثقوا أكتر في نقطة الشراء منك.
- إستخدم اختيارات وأنواع البوستات المختلفة الموجودة في الانستجرام، يعني تقدر تستخدم ال cross ads أو النوع اللي تشوفه مناسب لعرض منتجاتك.
- متنساش ال CTA يعني الأكشن اللي هتطلبه من العميل في الكلام المكتوب على صورة البوست عشان يبقى واضح للعميل المحتمل الخطوة اللي هيعملها عشان يطلب أوردر.
- إعمل عروض حصرية للناس اللي هتشتري على الانستجرام بس ولمدة معينة.
إعلانات الإنستجرام
عشان توصل لعدد كبير من الجمهور على الإنستجرام لازم تعمل إعلان ممول، وده ممكن يتعمل بسهولة مش طبيعية لدرجة إنك ممكن تعمله من على التليفون، والخطوات كالآتي :
- محتاج تعمل اكونت انستجرام بيزنس.
- إختار البوست اللي هتموله.
- دوس على تمويل.
- إختار هدف حملتك الإعلانية (سواء العميل يسيب بياناته في رسالة أو يروح لموقعك او ترافيك لموقعك أو تسجيل في فورمة بيانات أو غيره).
- بعدها حدد الجمهور المستهدف بناء على تحليل السوق اللي عملته في البداية خالص (منصة الانستا هتلاقي فيها نفس الأوبشنز الخاصة بالـ Looka Like والـ Custom Audience الموجودين عالفيس بوك)
- بعدها حدد الميزانية ومدة الإعلان وهتبدأ بـ تست في البداية وبعدها تقيس علي أساسه عشان ممكن نغير في الصورة أو التكست أو الاستهداف أو المحتوى، عشان تقدر تختار افضل شكل وتمشي عليه بعد كدة.
- استنى قبول الإعلان بعدها تصفح المشاهدات عشان تعرف أدائه ماشي ازاي وإعمل تحليل لسلوك اللي اشتروا يعني سألوا على ايه، ايه أكتر حاجة أقنعتهم على طول وهكذا.
تعليقات
إرسال تعليق