ازاي تقدر تسعر منتجاتك صح في مجال الدروب شيبنج ؟
تخيل بعد ما تعمل ويب سايت او صفحة فيس بوك عشان تنشر المنتجات عليهم وبعد ما تتفق مع بائع عنده منتجات إنه هيساعدك ويقدملك منتجاته تبيعها بنفسك وتكسب وبعد كدة تقدم المنتجات دي وإنت كلك أمل إن هيكون فيه بيع كتير وربح، وتتفاجيء إن اللي حصل كان عكس كدة تماماً، كان ركود تام ومش بس كدة العملاء بتشكك فيك، والسبب هو سعر المنتجات الزايد عن الحد واللي كمان زايد عن منافسينك، ماهو مش معقول العملاء هتسيب حد بيبيع منتج بـ 60 جنيه وتروح للي بيبيع نفس المنتج بـ 100 جنية، عشان كدة هنقولك على نصايح لازم تعملهم قبل عملية التسعير
الفئة المستهدفة :
يعني هتختار ساعات سويسرية على سبيل المثال يبقى هنا بتستهدف فئة عندها حب الإقتناء وبيقدروا الأشياء الغالية فهنا تقدر تخلي رينج التسعير بتاعك عالي بس طبعاً برضه تخلي بالك إنه يبقى في مستويات السوق والمنافسين
تابع السوق :
إعرف رينج سعر المنتج في السوق كام، انزل اسأل في الأسواق (يعني لو فرضًا هتبيع منتجات كهربائية يبقى تنزل سوق الكهرباء في وسط البلد وهكذا)، اعمل سيرش على سوق وجوميا، اسأل في جروبات الفيس بوك المتخصصة في المجال وهكذا
حدد تكلفة المنتج بالنسبة لك :
عن طريق حساب التكاليف زي قسط الدومين والإستضافة لو عامل موقع وتكلفة أي حد بيشتغل معاك وتكلفة الإعلانات الممولة لو عندك صفحة على السوشيال ميديا
الجملة :
حدد سعر الجملة بالنسبة لك عشان لو حد سألك ترد بسرعة، وطبعاً سعر الجملة لازم يبقى اقل من سعر التجزئة
التجزئة :
حدد سعر بيع التجزئة وده بناء على سؤالك للمورد وبناء على المعادلة دي : سعر بيع المنتجات (التكلفة الفعلية + هامش الربح
الربح :
حدد هامش ربحك للمنتج وده هتقدر تحدده بناء على دراستك السعرية للسوق وتحديد تكاليفك اللي اتصرفت، حاول في البداية يبقى هامش ربحك مش عالي أوي لحد ما منتجك يثبت نفسه
التقليد :
اوعى تقلد نفس أسعار المنافسين لإنك مش عارف هما حددوها بناء على ايه، خدها كمرشد فقط عشان تعرف الرينج في الطبيعي وعند الناس كام عشان لما تيجي تسعر تبقى عارف
شكل السعر :
تعرف إن طريقة كتابة السعر بتفرق جداً، يعني لو كوتشي ب 400 جنية اكتبه ب 399، لو طرحة ب 50 اكتبها ب 49.99 مثلاً
العروض :
متثبتش دايماً على سعر عشان الناس هتزهق، حاول تعمل عروض وخصومات لفترة محدودة وبكدة هتقدر تشجع الجمهور إنه ياخد خطوة الشراء
فيه مثال مهم جداً لازم تعرفه لإنه هيفيدك في نقطة تسعير المنتج :
محل احذية مشهور في امريكا اسمه بايليس عمل تجربة عشان يعرف المستهلكين بيقرروا يشتروا ويدفعوا فلوس كتيرة أو قليلة في المنتج بناء على إيه ؟
محل الأحذية ده بيبيع الأحذية في رينج 20 دولار، فأجر محل تاني لمدة يومين وجهزه بشكل فاخر وكتب على اليافطة اسم مصمم ايطالي وهمي (باليسي) وجابوا في الإفتتاح مشاهير ولبسوا الإستاف لبس فاخر بس الأحذية اللي في المحل مكنتش فاخرة، كانت ب 20 دولار، والمفاجأة إن الناس اشترت الأحذية دي ب600 دولار وأكتر
من الدروس المستفادة للقصة دي 3 حاجات
- الناس بتتأثر بشكل كبير بأراء المشاهير والبلوجر بالذات على السوشيال ميديا.
- لازم تتأكد أنك قبل ما بتبيع السلعة او الخدمة الجيدة انك تبيع اسم البراند بتاعك، عشان كل ما كان البراند معروف وواخد ثقة من الناس، كل ماهتقدر تغلي في الأسعار وهتفضل المبيعات محتفظة بقوتها لإن الناس بقى عندها إنتماء لقوة البراند نفسها.
- تغيير الصورة الذهنية صعب يعني محل الأحذية اللي عمل التجربة دي زعل جزء من العملاء واللي هيبقى صعب يكسبهم مرة تانية لإنه خدعهم.
تعليقات
إرسال تعليق